‘हॉटेल्सना पाहिजे मदतीचा हात’

मुंबई :
लॉकडाऊनमुळे हॉटेल उद्योगाला मोठा फटका बसला आहे. या संकटकाळात केंद्र सरकारने हॉटेल उद्योगाला मदत करावी, यासाठी रेस्तराँ टेक प्लॅटफॉर्म असलेल्या Dineout ने ‘नॅशनल रेस्तराँ असोसिएशन ऑफ इंडिया’ने (NRAI) च्या समर्थनार्थ मोहीम सुरु केली आहे. आतापर्यंत २० हजार नागरिकांनी या मोहिमेला पाठिंबा दिला आहे.
करोना रोखण्यासाठी देशभरात ३१ मार्चपर्यंत लॉक डाऊन जाहीर करण्यात आला आहे. यात देशभरातील हॉटेल आणि रेस्तराँसुद्धा बंद राहणार आहेत. यामुळे हॉटेल व्यवसायिक अडचणीत सापडले आहेत. उत्पन्नच बंद झाल्याने या उद्योगातील जवळपास ७० लाख नोकऱ्या संकटात सापडल्या आहेत.
Dineout ने change.org वर याचिका दाखल केली आहे. (https://www.change.org/ReliefForRestaurants) या याचिकेला आतापर्यंत जवळपास २० हजार नागरिकांनी पाठिंबा दिला आहे. त्यात मोठे हॉटेल उद्योजक, सेलिब्रेटी शेफ , फूड अँड ब्रेव्हरेजमधील उद्योजकांचा समावेश आहे. आर्थिक विकासात मोठं योगदान देणाऱ्या या उद्योगाकडे सरकारचे लक्ष केंद्रीत करण्यासाठी ही मोहीम सुरु करण्यात आल्याची माहिती Dineout चे सह संस्थापक अंकित मेहरोत्रा यांनी सांगितले.
‘नॅशनल रेस्तराँ असोसिएशन ऑफ इंडिया’ने (NRAI) अर्थमंत्री निर्मला सीतारामन यांना या संदर्भात पत्र लिहिले आहे. हॉटेल आणि रेस्तरॉं उद्योगाची वार्षिक उलाढाल ४ लाख कोटींच्या घरात आहे. यात जवळपास ७० लाख थेट रोजगार आहेत. या उद्योगातून सरकारला १८ हजार कोटींचा कर मिळतो. मात्र सध्या हा उद्योग संकटात सापडला आहे. करोनामुळे सारा देश लॉक डाऊन झाला आहे. कामगारांना आर्थिक सुरक्षा देण्यासाठी हॉटेल व्यवसायिकांकडे पुरेशी आर्थिक क्षमता उरलेली नाही त्यामुळे केंद्र सरकारने या उद्योगाला मदत करावी अशी मागणी जोर धरू लागली आहे.

LEAVE A REPLY

Please enter your comment!
Please enter your name here